Bab e Fazail Mola Abul Fazal Al Abbas Lyrics Urdu 2026
Bab e Fazail Mola Abul Fazal Al Abbas Lyrics Urdu
Aye Khuda Aisa Pisar De Jo Mera Sani Ho.
Naam Abbas Ho Woh Shair e Nayastani Ho.
Hath Oss Ka Bhi Yad e Quwat e Yazdani Ho.
Oss Ka Hamla Bhi Meri Tarha Se Tofani Ho.
Ho Baho Meri Tarha Qafila Salar Banay.
Main Alamdar Hoon Tu Woh Bhi Alamdar Banay.
Meri Guftar Si Guftar Ka Hamil Thehrey.
Woh Mere Jaisay Hi Kirdar Ka Hamil Thehrey.
Haan Mere Noor Ka Anwar Ka Hamil Thehrey.
Yani Woh Mere Hi Maiyar Ka Hamil Thehrey.
Roap Mera Ho Shujat Bhi Mere Jaisi Ho.
Mere Oss Sheer Ki Taqat Bhi Mere Jaisi Ho.
Ilm Ho Aisa Keh Woh Ilm Ka Darya Howay.
Shan Ho Aisi Keh Aqalon Se Jo Bala Howay.
Roab-o-Haibat Mein Woh Bilkul Mere Jaisa Howay.
Our Wafa Aisi Keh Konain Mein Charcha Howay.
Ashiq e Natiq e Quran Ho Beta Mera.
Teri Hujjat Ka Nigehban Ho Beta Mera.
Woh Jiye Tu Jiye Zahra Ke Pisar Ki Khatir.
Arzoye Dil-e-Sarwar Ke Samar Ki Khatir.
Tere Mehbob Ki Aankhon Ki Nazar Ki Khatir.
Yani Shabbir Se Mairaj-e-Bashar Ki Khatir.
Khatir e Ibn e Nabi Zeest Ka Samaan De De.
Hukam Zahra Ka Pisar De De Tu Woh Jaan De De.
Yeh Dua Pori Hoi Haq Se Dilawar Paya.
Apne Maiyar Pe Haider Ne Barabar Paya.
Apne Kirdar Se Kirdar Ka Paikar Paya.
Yani Khud Haider-e-Karrar Ne Haider Paya.
Jo Dua Mangi Thi Haider Ne Ossi Jaisa Tha.
Ho Baho Sar Ta Pa Abbas, Ali Jaisa Tha.
Jab Liya Gaud Mein Haider Ne Kaha Bismillah.
Mere Arman e Jigar Meri Dua Bismillah.
Mere Khursheed-o-Qamar Meri Zia Bismillah.
Aye Mere Lakht-e-Jigar Meri Ada Bismillah.
Khoob Jachta Tha Dar-e-Ilm Ko Gul Yasim Ka.
Chand Ki Gaud Mein Tha Chand Bani Hashim Ka.
Phir Youn Goya Hoye Haider Issay Almas Kaho.
Mera Armaan Meri Umeed Meri Aas Kaho.
Meri Tasveer Bana Hai Jo Woh Qirtas Kaho.
Naam Abbas Hai Iss Ka Issay Abbas Kaho.
Taqat-o-Himat-o-Mazboti e Lashkar Ban Ke.
Karbala Jaye Ga Yeh Dosra Haider Ban Kar.
Dono Pisran e Payamber They Bohat Khush Oss Din.
Dono Zahra Ke Gul-e-Tar They Bohat Khush Oss Din.
Dono Zainab Ke Baradar They Bohat Khush Oss Din.
Dono Tatheer Ke Paikar They Bohat Khush Oss Din.
Bari Bari Se Baradar Ko Jo Behlatey They.
Khoob Hasnain Karimain Sakoon Patay They.
Iss Se Barh Kar Na Koi Our Nazara Dekha.
Jab Keh Zainab Ne Rukh-e-Sheer Sanwara Dekha.
Gaud Mein Bhai Ko Le Kar Na Utara Dekha.
Chashm-e-Aflak Ne Zainab Ka Dulara Dekha.
Bhai Ko Chom Ke Aankhon Se Lagati Thin Kabhi.
Aap Oss Chand Ko Chadar Mein Chupati Thin Kabhi.
Baad Zainab Ke Barhein Sani-e-Zainab Aagay.
Mah-o-Khursheed Bichey Rah Mein Aagay Aagay.
Arsh Bunne Laga Midhat Ke Anokhay Dhagay.
Ibn e Karrar Ke Phir Our Muqadar Jagay.
Umme Kulsom Ne Zainab Se Jo Paya Ghazi.
Khoob Armano Se Bi Bibi Ne Uthaya Ghazi.
Umme Kulsom Ki Godi Se Dilawar Ho Kar.
Aaya Phir God e Madar Mein Woh Shair-e-Haider.
Chom Kar Lal Ko Maa Ne Kaha Mere Dilbar.
Apni Had Se Na Nikalna Kabhi Beta Bahar.
Jin Ki Tu Gaud Mein Tha Woh Hain Khuda Ka Chehra.
Teri Madar Hai Kaneez Inn Ki Hai Madar Zahra.
Apni Had Yaad Rahe Yaad Ho Rutba Inn Ka.
Yeh Hain Olad e Nabi Our Tu Sadqa Inn Ka.
Farsh Ta Arsh-e-Olla Hota Hai Charcha Inn Ka.
Khud Khuda Parhta Hai Har Waqt Qasida Inn Ka.
Ulfat-o-Chahat e Olad e Nabi Ki Khatir.
Tujh Ko Manga Hai Khuda Se Tu Inhi Ki Khatir.
Inn Ki Khidmat Ke Liye Inn Ki Itaat Ke Liye.
Inn Ki Ulfat Ke Liye Inn Ki Muhabbat Ke Liye.
Inn Ki Chahat Ke Liye Inn Ki Mawaddat Ke Liye.
Inn Ki Nusrat Ke Liye Inn Ki Hifazat Ke Liye.
Inn Ke Aagay Na Kabhi Qata Kalami Karna.
Kam Tera Hai Faqat Inn Ki Gulami Karna.
Gaud Mein Maa Ne Parhaya Jo Sabaq Yaad Raha.
Farq Mabain e Zameen Our Falak Yaad Raha.
Iss Ehd Namay Ka Har Aik Waraq Yaad Raha.
Yeh Sabaq Sheer Ko Ashor Talak Yaad Raha.
Maa Ke Farman Ki Har Waqt Nigehdari Ki.
Ummar Bhar Aal-e-Muhammad Se Wafadari Ki.
Din Guzarne Lagay Barhney Laga Ghazi Ka Qad.
Ho Baho Dikhne Laga Misal e Padar So Fisad.
Kiya Jawani Thi Kiya Andaz Tha Kiya Khal-o-Khad.
Dilnasheen Chehra Tha Ba Roab Thin Aankhein Be Had.
Ghar Se Bahir Jo Bin e Shah-e-Ummam Jata Tha.
Loag Ruk Jate They Bazar Bhi Tham Jata Tha.
Sin Jo Abbas Ka Phir Terah Baras Ko Pohancha.
Our Woh Din Aaya Keh Siffen Ka Maidan Saja.
Marka Kufar Se Phir Deen Ke Lashkar Ka Howa.
Our Iss Jang Mein Khud Haider-e-Safdar Ne Kaha.
Meri Janib Se Mera Lakht-e-Jigar Utray Ga.
Aaj Maidan Mein Haider Ka Pisar Utray Ga.
Sun Ke Yeh Qaul Barhey Jainb e Haider Hasnain.
Bolay Iss Baat Se Halchal Hai Hamarey Maa Bain.
Door Ab Kijiye Mushkil Ko Sheh-e-Badar-o-Hunnain.
Aakhir Iss Qaul Se Maqsood Hasan Hai Ya Hussain.
Bolay Haider Keh Yeh Aasan Kya Hai Main Ne.
Kab Nabi Zadoon Ka Ayelan Kya Hai Main Ne.
Aaj Khursheed Nahi Mah-e-Jali Jaye Ga.
Ibn e Mursal Nahi Farzand e Ali Jaye Ga.
Jo Hai Zahra Ki Dua Aaj Wohi Jaye Ga.
Yani Maidan Mein Abbas-e-Jarri Jaye Ga.
Foaj-e-Badkar Ke Sar Tan Se Oranay Ke Liye.
Jald Tayar Karo Shair Ko Jane Ke Liye.
Ho Ke Tayar Chala Ran Mein Wiqar Haider.
Apne Kandhoon Pe Sanbhalay Hoye Bar-e-Haider.
Apni Rag Rag Mein Liye Zoor-e-Fishar e Haider.
Roab Itna Tha Keh Dushman Bhi Pukarey Haider.
Dasht Mein Larney Ko Otar e Jali Aate Hain.
Bhago Bhago Aray Maidaan Mein Ali Aate Hain.
Bolay Phir Haider-e-Karrar Zara Hat Pichey.
Malik e Ashtar e Hubdar Zara Hat Pichey.
Oh Meri Foaj Ke Salar Zara Hat Pichey.
Kyun Bana Hai Yahan Dewar Zara Hat Pichey.
Chand Ko Seena e Geeti Mein Ubhartay Dekhon.
Main Bhi Khud Ko Zara Maidaan Mein Utartay Dekhon.
Sheer Aaya Jo Soye Dasht Tu Manzar Sehma.
Thartharane Lagi Dharti Dil-e-Ambar Sehma.
Aik Ik Qalb-e-Shaqi Seene Ke Andar Sehma.
Woh Nazar Wali Thi Lashkar Pe Keh Lashkar Sehma.
Aisa Lagta Tha Nigahon Se Chaba Jaye Ga.
Sare Lashkar-e-Ko Yeh Aankhon Se Hi Kha Jaye Ga.
Zulfiqar Aisay Chalaney Laga Safdar Ran Mein.
Jaisay Ik Barq Ho Poshida Jarri Ke Tan Mein.
Waar Karta Tha Kissi Sar Tu Kissi Gardan Mein.
Khon Hi Khon Tha Phaila Howa Khoni Ban Mein.
Sar Kati Lashon Ko Har Simt Bikharte Dekha.
Maut Ne Kitno Ko Oss Jang Mein Martay Dekha.
Fakhar-e-Mehtab Chamakta Howa Hashim Ka Qamar.
Saf Pe Saf Neer Ke Phir Bain Mein Pohancha Safdar.
Wast e Maidaan Mein Ajab Jalwa Dikhaya Aa Kar.
Foaj Se Ghir Gaya Khud Chah Ke Ibn e Haider.
Dhool Itni Thi Keh Abbas Kidhar Dikhte They.
Wast e Maidaan Se Bas Urtay Hoye Sar Dikhte They.
Phir Sada Aayi Ke Abbas Bas Ab Ruk Jao.
Oh Mere Taj Keh Almas Bas Ab Ruk Jao.
Oh Mere Ho Baho Akas Bas Ab Ruk Jao.
Bas Karo Bas Karo Abbas Bas Ab Ruk Jao.
Teri Iss Jang Pe Hairaan Hai Zamana Beta.
Baqi Johar Tere Karbal Mein Dikhana Beta.
Sun Ke :AHMAD: Yeh Sada Ruk Gaya Dast-e-Safdar.
Bola Lalkar Ke Phir Foaj Ko Ibn e Haider.
Ab Mein Karbal Mein Hi Dikhlaon Ga Apne Johar.
Yeh Tu Ik Hamla Tha Kul Jang Laron Ga Mein Udhar.
Haidery Taj Ka Almas Kisay Kehte Hain.
Phir Mein Batlaon Ga Abbas Kisay Kehte Hain.
Poet: :Ahmad Timsaal:
#BabeFazail
#MarsiyaLyrics
#tajpoint
Bab e Fazail Mola Abul Fazal Al Abbas Lyrics Urdu 2026 Write Up Poster Image
